Kjo karantinë vuri shumë prindër nën një sprovë të fortë: Për herë të parë e gjetën veten me fëmijët në shtëpi për një kohë shumë më të gjatë sesa thjesht një fundjavë, të kufizuar që të mos dilnim jashtë shtëpisë, ndërkohë që nuk ishim as me pushime. Një burgim i bukur që e ndanë me qenie të vogla humane me burime dhe energji të pafundme. A nuk e keni pyetur veten shumëkush prej jush: Po këta, ç’ kanë pirë sot?! Ndoshta keni qenë shoqja e munguar e kopshtit për të luajtur pambarimisht me kukullat Barbi, apo portieri në një futboll me të birin brenda atyre pak metrave katrorë të apartamentit, pasi virusi që është jashtë i detyroi edhe fëmijët të mbyllen në një botë më të vogël vetëm me ju. Dritarja e tyre e vetme ndoshta ka qenë televizori apo pajisjet elektronike. Por edhe aty, ju keni pasur mundësi të njiheni me dëshirat dhe interesat e tyre: A i pëlqen më shumë “Frozen”, “Sponge Bob”, “Bob Ndërtuesi”, “Teen Titans” apo “Ben 10”? Në këtë kohë të gjatë qëndrimi me ta, a nuk keni kuptuar se kush janë në të vërtetë këto qënie? Pse fëmija sillet ashtu siç sillet; Pse fëmija kërkon diçka duke qarë më shumë drejt babit sesa drejt mamit? Shikoni me kujdes pse fëmijët çohen natën dhe kërkojnë të vijnë te ju? Vëreni me kujdes sjelljen ndaj ushqimit, pse fëmijët tuaj duan të hanë ende nga dora juaj edhe pse janë thuajse 8 vjeç? Pse kërkojnë emrin tuaj, pikërisht atëherë kur ju jeni duke folur me një person tjetër sy me sy apo në telefon? Pse fillon të qajë pikërisht pak përpara se të shkojë të flejë? Pse kur fëmija është shumë i lumtur, ju jeni të detyruar t’i thoni “Mjaft!” ose “Mos!”, nga ekzaltimi i “tepruar”, se me siguri do të thyejë ndonjë gjë? Vetë sjelljet e tyre ju kanë dhënë edhe përgjigjen e kërkuar, sepse nuk ka një manual se si ta njohësh fëmijën tënd. Njohja më e mirë është t’i vëzhgojmë me kujdes, çdo ditë edhe përtej karantinës që kaluam, në çdo moment që jemi me ta. Mund të befasoheni nga përgjigjet që do të merrni!