Evropa po shkon me shpejtësi drejt një mbylljeje të re dhe shumë ekspertë paralajmërojnë një nëntor dhe dhjetor sfidues për sistemet shëndetësore nga ajo që gjithnjë e më shumë po cilësohet si vala e dytë e Covid19. Italia fqinje ka vendosur mbylljen e plotë të kinemave, teatrove dhe orar të kufizuar për baret dhe restorantet të cilat do të qëndrojnë të hapura deri në orën 18.00. Ndërkohë është vendosur për një mbyllje të palestrave dhe pishinave ndërsa qytetarëve ju këshillohet të shmanget transporti publik sa më shumë. Shkollat e ciklit të ulët është vendosur të lihen të hapura, por për pjesën tjetër urdhërohet të ndiqen metodat online. Kjo fazë kufizimesh për Italinë pritet të zgjasë deri në 24 nëntor, por masat sipas autoriteteve do të hiqen vetëm nëse do të ketë një përmirësim të situatës. Mjeku urolog në spitalin e Brescia-s, doktor Julian Balla tha se pavarësisht ccdo parashikimi që është bërë për një pik të dytë të pandemisë, nuk pritej që situata të rëndohej kaq shpejt dhe ti gjente sërish spitalet të papërgatitura. Nga ana tjetër Spanja si pasojë e shifrave të larta, ku numri i ka kaluar 1 milionë persona të prekur, ka shpallur sërish gjendjen e jashtëzakonshme fillimisht për 2 javë, me mundësinë e zgjatjes me 6 muaj nëse situata përkeqësohet. Sipas këtij vendimi, i gjithë vendi do të futet në izolim duke filluar nga ora 23:00 deri në orën 06:00, administrata do të funksionojë e reduktuar vetëm me punonjësit që nuk kanë mundësi të punojnë nga shtëpitë. Në Zvicër është bërë publik një udhëzim i brendshëm që u këshillon autoriteteve një hierarki trajtimi mjekësor të pacientëve të infektuar me Covid19. Sipas këtij udhëzimi, këshillohet që pacientët e moshës 75 deri në 85 vjeç dhe me historik sëmundjesh të jenë të fundit që vendosen në frymëmarrje të drejtuar, më pas pacientët e moshës 65 deri në 75 e kështu me radhë