Nxënësit e arsimit parauniversitar në vend që prej 10 marsit kanë nisur mësimin online, sipas udhëzimeve të ministrisë së arsimit duke përdorur platformat digjitale televizive apo rrjetet sociale, të gjitha të aksesueshme nëpërmjet internetit. Janë 571.616 nxënës të grupmoshave të ndryshme të cilët tashmë janë të detyruar të ndjekin mësimin në distancë deri në një urdhër të ri për hapjen e institucioneve arsimore. E drejta për arsim është e detyrueshme për të gjithë fëmijët, por metodat e reja që po përdoren në këtë kohë pandemie duket se nuk garantohet për të gjithë nxënësit , kjo për arsye se shumë familje në Shqipëri nuk kanë akses në internet, nuk zotërojë mjete të teknologjisë e nga ana tjetër ka të dhëna se shumë familje nuk i paguajnë dot kostot e internetit. Për këtë arsye së fundmi CRCA/ECPAT(Qendra për Mbrojtjen e të Drejtave të Fëmijëve në Shqipëri)dhe Koalicioni për Arsimin-ACE, kanë ngritur shqetësimin në lidhje me shkeljen e të drejtës për arsim cilësor dhe të barabartë publik për të gjithë ata fëmijë që jetojnë në familje që nuk kanë akses as në internet dhe në platformat digjitale televizive, ku Ministria e Arsimit dhe trupa mësimore po zhvillojnë mësimin në arsimin parauniversitar publik në Shqipëri. Por si është situata, sa fëmijë nuk po arrijnë të mësojnë online, kishim në një lidhje Skype, koordinatoren e Koalicionit për Arsimin në Shqipëri, Linda Pino.