Për herë të parë Pashkët u festuan në një mënyrë krejt të pazakontë në Shqipëri. Në të gjithë Javën e Madhe të Pashkëve, por edhe në fundjavë, mesha nuk u kremtuan me njerëz. Situata e emergjencës ka bërë që në pjesën më të madhe të kishave ceremonitë fetare u mbajtën, por vetëm nga meshtarët. Jo vetëm për “Javën e të gjitha Javëve”, më kryesoren në të gjithë kalendarin e liturgjisë katolike, por edhe për Ditën e Pashkës, Dom Gjergj Metën pati një ide vërtet pozitive. Duke qenë se besimtarët nuk shkonin dot në kishë për të kremtuar Pashkën shkoi Kisha në shtëpitë e tyre. Natën e Pashkës, Dioqeza e Rrëshenit pas meshës së Pashkëve doli në rrugët dhe rrugicat e qytetit ndërsa besimtarët kishin dalë në ballkonet dhe dritaret e shtëpisë me një qiriun e Pashkës të ndezur për të kremtuar ringjalljen e Krishtit. Një nismë që u mirëprit nga besimtarët katolikë. "Ishte emocionues në fakt se ne i përshëndetëm dhe uruam Pashkët nga poshtë dritares dhe ata na uronin nga shtëpitë e tyre. Njerëzit nuk vinin dot në Kishë kështu që shkoi Kisha, liturgjia,Krishti dhe trokiti në shtëpitë e njerëzve. Kam marrë mesazhe shumë për këtë inisiativë. Në këtë situatë çdo lloj kreativiteti pozitiv është i lejuar edhe nëse dilet pak nga shinat e formalitetit të përhershëm. Kjo nuk është e parashikuar në liturgjikë tonë katolike që të dilet në rrugë pas meshës së Pashkëve. Nuk ekziston askund por në situata të tilla mendoj se jemi të lejuar ta bëjmë një gjë të tillë që sjell vetëm mirë"- tha Imzot Gjergj Meta Ipeshkvi i Dioqezës së Rrëshenit.