Ilire Vinca, aktorja e spikatur për rolet e saj në filma e në teatër, pak ditë më parë është ftuar që të bëhet pjesë e Akademisë Evropiane të Filmit. Ky është një vlerësim që vjen si rezultat i karrierës së saj disa vjeҫare jo vetëm në aktrim por edhe si pedagoge në Universitetin e Prishtinës. Ilire është anëtarja e 16-të nga Kosova që bëhet pjesë e kësaj akademie. Ajo u bë e njohur edhe si aktorja e parë që mori pjesë në Berlinale me filmin ‘Falja e Gjakut’ në 2011, pastaj për herë të dytë edhe me filmin ‘Burrneshat’. Po ashtu ajo ka luajtur edhe tek filmi ‘Zana, ‘Pranverë e paharruar në fshatin e harruar’, ‘Gardhi’ apo ‘Martesa’. Po ashtu ajo ishte e angazhuar në shfaqjen e suksesshme “Natën ma” nën regjinë e Ema Andreas në Teatrin e Metropolit në Tiranë. Ilire numëron rreth 25 vjet karrierë me mbi 35 role në kinematografi e teatër. Ilire ka lindur në Strugë dhe për arsye politike u vendos në Kosovë së bashku me familjen ku studioi për mjekësi (dëshira e prindërve) dhe për aktrim. Ajo e la mjekësinë për këtë të fundit që është pasioni i saj më i madh.