Që prej muajit shtator 2019 Shqipëria u bë pjesë e vendeve që aderojnë në konventën evropiane të Farmakope-së, një mekanizëm i Këshillit të Evropës që përcakton standarde cilësie dhe sigurie të barnave, duke na afruar gjithnjë e më shumë me tregun e përbashkët Evropian. Ratifikimi nga Parlamenti i dha fund një neglizhence institucionale 24-vjeçare, që e kishte mbajtur Shqipërinë si të vetmin vend në hapësirën evropiane jashtë konventës. Ministria e Shëndetësisë finalizoi me sukses procesin ligjor dhe falë tij në shtator 2019, Shqipëria u bë vendi i 39 që aderon në Konventën për Përpunimin e Farmakope-së Evropiane. Prej këtij shkurti, hyjnë në fuqi edhe në Shqipëri rregullat e kësaj konvente, për të pasur një standard medikamentesh si kudo në Europë. Përveç nesh si konsumatorë, sot më i lumtur ndjehet edhe Admir Malaj, farmacist me profesion, i cili nisi katër vite më parë një aktivizim të mirëfilltë advokues për këtë çështje.