Mëngjesin e 29 shtatorit, punonjësit e Administrimit të Zonave të Mbrojtura në Fier lanë të lirë Elsën, lejlekun e ri shtegtimi i së cilës ka qenë plot vuajtje dhe peripeci ashtu sikurse edhe plot përkujdesje. Elsa me shumë gjasë ka çelur në Slloveni dhe iu vu unazë në këmbë (matrikulim) nga Muzeu i Historisë së Natyrës së Sllovenisë në datë 8 gusht të këtij viti, pasi ishte gjetur e plagosur rëndë pranë gjoksit, me shumë gjasë si pasojë e sulmit të ndonjë shpendi grabitqar. Elsa, fillimisht u mbajt për 2 javë në qendrën e rehabilitimit në Muta të Sllovenisë, nga ku më tej është lëshuar. Më datë 15 shtator ky lejlek u raportua në Ulqin, nga kolegët e qendrës Malazeze për Studimin dhe Ruajtjen e Shpendëve dhe 2 ditë më vonë lejleku është ulur në gjendje të dobët fizike në qendër të Tiranës, ku u kap dhe u mbajt në gjendje kaptiviteti deri sa fotografi njohur z.Albert Cmeta mësoi mbi rastin dhe ndërhyri për ta shpëtuar. Zoti Cmeta kontaktoi qendrën “Shpendët e Shqipërisë” që bëri këqyrjen dhe vlerësimin e menjëhershëm të gjendjes së shpendit dhe vendosi ta dërgojë për trajtim në Qendrën e Rehabilitimit në Shpendëve të Egër në Divjakë, ku qëndroi 10 ditë dhe mori një përkujdesje të dalluar nga stafi i saj. Elsa arriti në qendrën e Divjakës, në kufijtë e nënpeshës, rreth 2.3 kg dhe falë përkujdesjes, në momentin e lëshimit kishte peshën 3 kg. Sot ne rrëfyem historinë e veçantë të Elsës, por edhe për rikthimin e lejlekëve të tjerë. Lejleku është një prej shpendëve më të rrezikuar në vendin tonë, me një popullatë folezuese prej vetëm 7 çiftesh.