Ashtu si ishte njoftuar, pika kufitare e Kakavijës, e vetmja pikë kalimi me Greqinë aktualisht, ka qëndruar e mbyllur që prej ditës së djeshme për 24 orë. Në fakt kjo pikë nuk u mbyll për shkak të pandemisë dhe situatës së rënduar në shtetin helen, por si pasojë e një greve 24 orëshe që kishin njoftuar punonjësit e palës greke. Në një lidhje direkte në pika kufitare e Kakavijës, gazetarja Kristina Fidhi tha për programin Wake Up në Top Channel se pas bllokimit të djeshëm kjo pikë është hapur sot në mëngjes që në orën 06.00, ndërkohë që nga kjo pikë do të lejoheshin të kalonin vetëm udhëtarët këmbësorë, kamionët që transportojnë mallra ushqimore që ruhen në kushte frigoriferike, kamionët që transportojnë kafshët e gjalla dhe automjetet për raste emergjente shëndetësore apo raste vdekjesh. Kujtojmë se Kakavija është e vetmja pikë kalimi me Greqinë, pasi ajo e Kapshticës u mbyll të premten e kaluar si pasojë e rëndimit të situatës në shtetin grek nga pandemia, dhe në veçanti gjendjes së rënduar në spitalet e Selanikut. Por çfarë po ndodh aktualisht në Kakavijë, a ka mbaruar greva dhe cilat janë rregullat e reja që u shtuan nga shteti grek ditët e fundit për kalimin nga kjo pikë doganore.