Ditën e djeshme në Greqi ka nisur një protestë e përgjithshme 24-orëshe që ka bllokuar të gjithë transportin publik në Athinë. Linjat e trenit, transportit urban, anijet në portet greke kanë ndalur punën duke mos ofruar shërbim. Protestave i janë bashkuar nëpunësit bashkiakë madje edhe vetë gazetarët. Në fokus të protestave të ditës së djeshme ka qenë reformat frenuese që janë propozuar kohët e fundit për pensionet, sigurimet shoqërore, si dhe për çështjet sociale. Sindikatat janë shprehur me argumentin se qeveria me ndryshimet që i kanë bërë ligjit privatizon sigurimet dhe i shtyn punëtorët e rinj drejt kapitaleve të huaja private. Kujtojmë që në këtë projektligj përveç dispozitave të tjera, parashikohet edhe përjashtimi nga pensioni shtetëror nëse nuk ke zyrtarisht me dokumente ligjore 40 vite punë në shtetin grek. Gazetari Artur Bibe u shpreh se nga kjo skemë e re preken 700 mijë shqiptarë.