Disa ditë më parë na tërhoqi vëmendjen një status në Facebook i aktorit Gent Hazizi, i cili i bënte apel autoriteteve që ta angazhonin si vullnetar për të shpërndarë ushqime apo për të bërë pazarin për pensionistët. Duket se ky status e bëri punën e vet pasi tashmë Genti është angazhuar për të ndihmuar ata që kanë më shumë nevojë në njësinë mini bashkiake nr 5, aty ku ai banon. Nisma që ai ka ndërmarrë quhet "Fushatë n'pallat" dhe ai nxit të gjithë banorët e pallatit të vet por edhe këdo tjetër që të dhurojnë të paktën 20 lekëshin që do të linin bakshish në kafene. Të ardhurat e grumbulluara shkojnë për ata pensionistë apo persona në nevojë. Përmes këtyre ndihmave personave në fjalë do t'i sigurohen ilaҫe, ushqime, apo produkte të tjera të paktën për një periudhë disa javore. Genti, përmes administratorëve të pallateve dhe përfaqësuesve të tjerë administrativë, kanë piketuar ato familje apo persona që kanë vështirësi ekonomike dhe iu telefonojnë për t'i ҫuar ndihmat në shtëpi. Ky është një shembull pozitiv edhe për shumë artistë apo personazhe të tjerë të njohur të cilët mund të japin kontributin e tyre në këtë situatë të vështirë të pandemisë. Po ashtu ҫdo mbrëmje në orën 20:00, Genti fton live në Instagram artistë të njohur si: Gaz Paja, Aurela Gaҫe, Florian Binaj, Elton Deda e me siguri edhe me shumë të tjerë në vazhdim, të cilët po ashtu synojnë që të sensibilizojnë ndjekësit e tyre për të kontribuar sadopak.