Të prekurit me Covid19 në vendin tonë vazhdojnë të rriten nga dita në ditë. Por ndërsa gjendja e tyre mbetet e stabilizuar sipas autoriteteve të shëndetësisë, apo edhe masat që janë marrë, të gjithë pyesin a do të kemi të njëjtin fat si Italia, Kina, Spanja, ku numri i viktimave dhe të prekurve rritet nga dita në ditë? Si do të përjetohet nga sistemi imunitar i shqiptarëve, koronavirusi. Prof. Dr Genc Sulccebe, mjek i njohur i specializuar në fushën e imunologjisë ditët e fundit është shprehur se nuk duhet të trembemi nga koronavirusi. Në një lidhje skype në Wake Up ai u shpreh se "Nuk ka imunitet të përgatitur ndaj këtij virusi, por ajo që unë e konsideroj të rëndësishëm është fakti se po punohet për vaksinën. Dua të theksoj se kalimi i virusit nga një individ në tjetrin e dobëson atë. Virusi sigurisht mund të ketë pësuar mutacione por ato janë të vogla"- tha Sulçebe. I pyetur për mendimin se shqiptarët dhe ballkanasit mund të jenë imun ndaj këtij virusi, mjeku i njohur sqaroi: "Popullata botërore ka shumëllojshmëri gjenesh. Ne kemi shumë studime përsa i përket gjeneve të popullatës shqiptare ne kemi ngjashmëri gjenetikisht me popujt e Ballkanit. Sa më larg gjeografikisht popujt aq më të ndryshme edhe gjenet. Me këtë dua të them se gjenet tona janë shumë larg (të ndryshme) nga ato të popullit kinez dhe pak më të ndryshme nga ato të Italisë së veriut. Unë besoj se 80% e individëve do ta kalojnë virusin me simptoma të lehta"- tha Dr. Genc Sulçebe.