Pas tre viteve pune intensive, piktori i njohur Gazmend Leka sapo ka hapur ekspozitën e tij personale, e cila vjen me një larmi veprash dhe mesazhesh. Ekspozita "Noe" është pjesë e ciklit të triologjisë "Lutja" dhe "Dhoma e hapave të humbura". Emri i saj nuk ka të bëjë me personazhin biblik (profetin) por Leka i vendosi këtë emër që njerëzit të bëjnë lidhjen me përmbytjen, jo me atë biblike por me përmbytjen e fshatrave dhe qyteteve që ndodh çdo vit në Shqipëri. Në këto piktura ai ka pasqyruar rrezikun për humbjen e jetëve të njerëzve, të bagëtive, të banesave apo çdo element tjetër që është prekur nga ky fenomen. Aty shikon personazhe që përpiqen të shpëtojnë kafshët ose të sendet e rëndësishme duke i mbajtur mbi supe, të tjerë që janë të mbuluar nga uji, bagëti që po mbyten, shtëpi nën ujë, errësirë, objekte të shkatërruara...etj. Në çdo pikturë mund të zbërthesh më shumë sesa një mesazh dhe kjo varet nga mënyra se si e percepton secili prej nesh.