Suedia është një nga vendet që duket sikur ka marrë më pak masa për të minimizuar rrezikun e prekjes nga koronavirus. Sipas të dhënave zyrtare të publikuara dje pasdite në Suedi rezultojnë deri më tani 42 të vdekur, 2510 të prekur nga Covid-19. Vetëm 24 orët e fundit u shënuan 200 raste të reja të të infektuarve me Covid-19. Por pavarësisht shifrave qeveria suedeze nuk ka marrë masa drastike, jeta atje vijon normalisht. Kryesisht masat e marra, janë përqendruar në informimin e qytetarëve sidomos ata të huaj. Janë shpërndarë informacione rreth Covid-19 në gjuhë të ndryshme. Përveç vetizolimit të qytetarëve, të cilët nga frika kanë zgjedhur të mbyllën vetë në banesa, baret, restorantet dhe qendrat tregtare janë të hapura në të gjithë vendin. Disa ditë më parë edhe aty qytetarët u dyndën në supermarkete për t'u furnizuar. Një nga masat që ka marrë qeveria është ndalimi i fluturimeve jashtë kufijve të atyre që nisen për pushime, por lejohet që të fluturojnë për arsye pune apo kthimi në atdhe. Ndërkohë vetëm shkollat e larta dhe gjimnazet janë mbyllur, ndërkohë që ҫerdhet, kopshtet apo shkollat fillore janë akoma të hapura. "Covid nuk do të zhduket nëse mbyllim institucionet arsimore, por do të vazhdojë të jetë mes nesh për një kohë të gjatë"- deklaruan dje drejtuesit i Shëndetit Publik. Qeveria suedeze beson se virusi mundet me imunitet dhe jo domosdoshmërisht me izolim. Për të qenë të përgatitur për emergjencat që mund të sjellë ky virus, është ndërtuar edhe një spital që do të jetë në shërbim të të prekurve. Sipas të dhënave të orëve të fundit në Suedi raportohet për mbi 2350 të infektuar dhe rreth 40 viktima por të dhënat ndryshojnë orë pas ore me shtimin e rasteve të reja. Por, për më shumë lidhur me situatën e deritanishme aty, ne ishim sot me gazetarin, Ervin Dushin i cili jeton aty prej disa vitesh.