Muhamet Veliu është një ndër gazetarët më të hershëm të politikës por siç shprehet dhe vetë në këtë periudhë izolimi nuk ja ka ndjerë dhe aq mungesën raportimeve nga salla e Kuvendit. Arsyeja?! "Parlamenti gjatë këtyre kohëve është një prej institucioneve më të lehta për të raportuar pasi nuk është më ai parlamenti ku ka një shpirt të madh debati dhe kundërshtie opozitarizmi. Janë shumë elementë që e kanë dobësuar parlamentarizmin shqiptar dhe kësisoj deri diku të gjithë seancat e parlamentit janë copy-paste, ndaj si gazetar politike nuk ndjej ndonjë sadisfaksion të madh të raportoj nga ky parlament pavarësisht se është e rëndësishme për publikun"- tha gazetari Muhamet Veliu. Ndërkohë këto ditë ai ka qenë në terren për të raportuar situatën e Kovid-19. Po si e përjeton ai vetë gjithë këtë situatë "i zhveshur" nga kostumi i profesionit. "Janë momente të vështira pasi gjatë gjithë kohës raportojmë nga terreni dhe e gjithë frika lidhet kur ne shkojmë në shtëpi tek të afërmit tanë. Ndërkohë unë kam rreth 37 ditë që nuk takoj prindërit, pasi ata janë të izoluar, ndërkohë që bashkëshortja mësuese në profesion qëndron në shtëpi, dhe çdo ditë më ka shoqëruar frika se mos unë jam mbartës i virusit dhe mund t'ia transmetoj bashkëshortes. Nga ana profesionale,r ky është lajmi i shekullit dhe nuk besoj se si gazetar do të kemi mundësi në vitet e ardhshme të përfshihemi në raportime kaq intensive të një ngjarje kaq të madhe. Kështu që nga kjo anë është një sadisfaksion për të informuar qytetarët të cilët kanë qenë të izoluar në shtëpi".