Me pandeminë Covid 19 po përballet prej disa javësh edhe shteti fqinjë Greqia. Lajmet e djeshme që vinin nga vendi fqinj tregonin se mes të prekurve është edhe një grua shqiptare nga Saranda e cila jeton dhe punon në Greqi. Gazetari i TCH në Athinë, Artur Bibe raportoi për Wake Up se në fakt gruaja nga Saranda e para shqiptare e konfirmuar me koronavirus ka infektuar gjithë familjen dhe ata ndodhen aktualisht në karantinë. "Unë dje fola me bashkëshortin e gruas në fjalë dhe fatmirësisht ata janë jashtë rrezikut për jetën"- tha gazetari i TCH, Artur Bibe. Fatkeqësisht mediat ditën e djeshme kanë raportuar edhe viktimën e parë në shtetin helen. Viktima ka qenë një 67 vjeçar grek i cili më herët ka vizituar Jeruzalemin. Mediat greke bëjnë me dije se ai ishte testuar pozitiv me COVID-19 më 2 Mars, por pavarësisht përpjekjeve të mjekëve dhe terapisë, nuk ka mundur të mbijetojë. Në Greqi numri i të infektuarve ka arritur në mbi 90 persona, ku një pjesë e tyre kanë pasur histori udhëtimi me Italinë. Ndërkohë autoritetet janë të shqetësuara pasi 10 % e rasteve të të prekurve nuk dihet se ku e kanë marrë virusin fakt që sipas specialistëve do të rrisë rastet sot ose në ditët në vijim.