Pas tërmetit të 26 nëntorit, në fazën e emergjencës ka ecur paralelisht edhe monitorimi i situatës shëndetësore dhe kushteve higjieno-sanitare aty ku ka grumbullime të shumta njerëzish. Ndonëse jemi edhe në periudhën e pikut të sezonit të gripit, ministria e shëndetësisë ka vijuar fushatën e saj edhe në kampet, hotelet, qendrat sociale ku janë të strehuar të gjithë të prekurit nga kjo fatkeqësi natyrore. Të gjitha kategoritë në rrezik po i nënshtrohen vizitave, kontrolleve, vaksinimit, ndërkohë që është rritur vigjilenca edhe ndaj sëmundjeve të tjera infektive që mund të bëhen prezente në vendet ku janë të strehuar banorët, si pasojë e nivelit të ulët të higjienës, apo edhe ushqimeve që mund të konsumohen dhe që nuk rruhen në temperaturat dhe vendet e duhura.