Qendra Kombëtare e Urgjencës Mjekësore e njohur si "Alo 127" është "porta" e parë ku njerëzit trokasin sapo termometri i tyre shënon temperaturë sipër vijës së kuqe 37. Me shtimin e virozave duket se edhe frika e njerëzve është shtuar përballë rrezikut COVID-19 që ka gjunjëzuar gjithë botën. Sezoni vjeshtë-dimër pritet sipas ekspertëve të shtojë ndjeshëm rastet dhe 127 është sistemi i parë i ngritur që sinjalizon fluksin që do të pasojë në spitale. "Ka një shtim të numrit thirrjeve drejt 127 pasi njerëzit marrin në telefon me shenjën e parë që kanë jo vetëm për t'u informuar por dhe për të bërë tamponin" - tha Dr.Skënder Brataj, Drejtor i Qendrës Kombëtare të Urgjencës Mjekësore. Tirana Shkodra, Durrësi janë qytetet nga vijnë më shumë thirrje drejt numrin të Qendrës Kombëtare të Urgjencës. Për t'i paraprirë një situate të vështirë që mund ta çonte sistemin shëndetësor në kolaps, janë përgatitur disa skenarë. Krahas 4 spitaleve COVID, në trajtimin e pacientëve me COVID-19 do të jenë në funksion edhe spitalet rajonale. Në skenarin e parë do të përfshihen spitalet rajonalë në Durrës, Elbasan, Korçë, Vlorë, Shkodër. Në skenarin e dytë përfshihen spitalet rajonale të Beratit, Lezhës dhe Fierit. Në skenarin e tretë përfshihen spitalet rajonale të Gjirokastrës, Dibrës dhe Kukësit. Ndërkohë është rritur me 30% numri i epidemiologëve në terren për të monitoruar situatën. Duke qenë se tashmë pritet që të qarkullojë dhe gripi sezonal i cili ka simptoma të ngjashme me Covid19, pritet që të ketë një konfuzion të madh në opinionin publik të cilët do të kërkojnë ndihmë në numrin 127 të urgjencës kombëtare. Por si parashikohet situata në muajt në vijim, a ka pasur rritje të numrit të thirrjeve pranë urgjencës kombëtare që është hapi i parë me të cilin përballen qytetarët që kanë dyshime.