Tërmeti i 26 nëntorit duket se ka sjellë një ndërgjegjësim të kompanive e individëve për të bërë sigurimin nga zjarri dhe dëmtimet në pronë. Të dhënat e Autoritetit të Mbikëqyrjes Financiare tregojnë një rritje të ndjeshme në dhjetor, si të numrit të kontratave për këtë klasë sigurimi, ashtu dhe të primeve të shkruara bruto, ndryshe nga të gjithë 11 muajt e parë të 2019-s. Vetëm në dhjetor sigurimi nga zjarri dhe dëmtime të tjera në pronë pati një rritje prej 29.4% në krahasim me të njëjtën periudhë të një viti më parë. Gjithsesi operatorët e tregut pohojnë se pas tërmetit të 26 nëntorit pati një rritje të interesit por që tashmë dita ditës ky interes po zbehet. Sigurimet vullnetare për sigurimin nga zjarri dhe dëmtimet në pronë mbeten në një peshë mjaft të ulët ndaj totalit. Në 2019-n, ato përbënin 7.4% të numrit të kontratave dhe 13% të totalit të primeve. Një ndër mundësitë që ofron tregu i sigurimeve është edhe mbrojtja nga ngjarjet e vështira natyrore, të cilat mund të sjellin pasoja edhe në pronën e qytetarëve apo bizneseve. Sigurimi i pronës është një nga konceptet e reja që ka hyrë në marrëdhëniet financiare të qytetarëve me pronën e tyre. Kjo, në shumicën e rasteve, është e lidhur edhe me detyrimet e kërkuara nga marrëdhëniet me bankat, për kreditë që merren nga qytetarët për blerjen e banesave.