Kur dëgjojmë se shumë njerëz vijojnë të punojnë nga shtëpia, ndonjëherë na duket luks dhe mendojmë se sa komode duhet të jetë. Por në fakt edhe puna nga shtëpia ka pasojat e veta në shëndet dhe sidomos në fizikun tonë. Ekspertët e punësimit të kompanisë "DirecttlyApply", kanë analizuar pasojat afatgjata të punës nga shtëpia duke krijuar identikitin e një modeli të quajtur "Susan". Ky individ në 25 vitet e ardhshme do të pësojë një transformim të madh fizik, që nga pesha, gjymtyrët, shtylla kurrizore, flokët, sytë...etj. Megjithatë ky mbetet një model hipotetik pasi është shumë e vështirë që një person të punojë kaq gjatë vetëm nga shtëpia, i shkëputur nga kolegët apo nga aktiviteti fizik. Ekspertët këshillojnë që të gjithë ata që zgjedhin ose detyrohen të punojnë nga shtëpia, të kujdesen më shumë për veten, të ngrihen nga karrigia herë pas here, të bëjnë ushtrime fizike, të shkëpusin kontaktin me kompjuterin për disa orë si edhe të mos konsumojnë pa kriter. Informacione rreth kategorive dhe moshave që po shfaqin vitet e fundit deformime fizike por edhe këshilla shumë të vlefshme morëm sot nga fizioterapisti Ilvi Begolli.