"E Diell n'fermë" është një ndër rubrikat më interesante që ka spikatur në sezoni e ri të spektaklit "E Diell". Ideja është që personazhe të njohur publikë e kalojnë fundjavën në një fermë të shoqëruar nga gazetari Ervin Kurti dhe ju duhet që të bëjnë punë fshati nga më të ndryshmet. Deri tani janë realizuar tre puntata ku kemi parë personazhe si Anxhela Peristeri, Marjana Kondi, Viola Spiro, Ervin Salianji, Devis Xherahu, Eva Murati, Redon Makashi, Klodiana Shala, Kozma Dushi, Liljana Kondakçi apo Mariza Ikonomi. Ata kanë mjelë lopët, kanë pastruar derrat, janë përballur me strucin, kanë ushqyer pulat, patat apo gomarin, kanë përgatitur djathin, punuar tokën e shumë punë të tjera që nuk i kishin provuar më parë. Pa diskutim në fund të gjithë këtyre kanë shijuar edhe gatime të shijshme bio të zonave ku është realizuar emisioni.