Të gjithë "të pabindurit" që kanë shkelur masat anti-COVID përgjatë 7 muajve, përfshirë këtu edhe kur vendi ka qenë në karantinë totale, janë falur tashmë. Lajmi i mirë erdhi dje pasi Qeveria me Akt Normativ ka vendosur që të falen gjobat, të kthehen makinat dhe patentat e bllokuara. Gjithashtu, falen edhe gjobat e vendosura ndaj familjeve të prekura nga 2 tërmetet (21 shtator dhe 26 nëntor 2019) për shkeljet gjatë kryerjes së punimeve. Bëhet fjalë për gjobat e vendosura nga 17 prilli deri në 7 tetor 2020. Institucionet përkatëse duhet të përgatisin para datës 30 tetor listën e personave që janë ndëshkuar dhe do të duhet t'u kalojnë paratë në llogaritë përkatëse jo më larg se data 15 nëntor. Fatos Coçoli eskpert ekonomie shpjegoi se masat ndëshkuese që ndërmorri qeveria gjatë periudhës së karantinës ishin pa bazë ligjore dhe ky vendim për faljen e tyre është në fakt një korrigjim i vetë qeverisë i një situate paligjshmëri mes qeverisë dhe qytetarëve të saj.