Braktisja e shkollës fenomeni që nuk po ndalet që prej 15 vitesh ndaj qeveria vendos të mbështesë me bursa ata që rrezikojnë të lënë shkollën. Sipas ministrisë në Shqipëri nga viti në vit ka pasur rreth 10,000-20,000 nxënës më pak në gjithë sistemin e arsimit parauniversitar, parashkollor, shkollë fillore, e mesme ulët dhe e mesme e lartë. Trendi i rënies ka filluar nga viti 1992 dhe kjo për arsye nga më të ndryshmet. Përballë kësaj situate qeveria ka ndërmarrë një vendim në muajin tetor, që në listën e përfituesve të bursave për nxënësit e arsimit parauniversitar, të fusë dhe fëmijët që kanë braktisur shkollën apo që janë kontigjent në risk. Fatmir Vejsiu, ish drejtor i arsimit parauniversitar foli për arsyet pse është i përhapur ky fenomen në Shqipëri dhe a janë të mjaftueshme masa të tilla.