Kjo javë është vendimtare për Shqipërinë për të kuptuar në çfarë përmasash do të jetë infektimi nga Covid-19. Kjo sepse periudha e inkubimit të virusit, dmth sa ai qëndron në trupin e njeriut të infektuar pa shfaqur simptomat, është rreth 14 ditë. Personi i parë i infektuarnë Shqipëri u gjet më 8 mars. Ndaj fundi i periudhës së inkubimit llogaritet të jetë diku rreth datës 22 mars, kur mund të jetë kulmi i parë i shpërthimit për numër njerëzish të infektuar. Autoritet thanë se ai djaloshi nga Puka ishte pacienti zero, por siç treguan ditët më pas, ai ishte i pari, por ndoshta jo pacienti zero. Ato ditë, bashkë me të, kanë ardhur edhe shqiptarë të tjerë nga Italia nga pika të tjera hyrëse. Eugena Tomini, Shefe e Inteligjencës Epidemike, ISHP tha se: "Këto dy javë janë vendimtare në hapjen e trendit të rasteve pozitive. Në perceptim të parë duhet vlerësuar që ka sensibilitet të popullatës por duhet të vazhdojë kështu që ta minimizojmë përhapjen e virusit. Në ditët në vazhdim shihet një gjendje e qëndrueshme dhe ajo që duhet vlerësuar, fatmirësisht ky virus nuk ka pasur agresivitet të madh në Shqipëri, të paktën deri tani"