Ka një debat të madh, edhe politik, më shumë teste, më pak teste. Por nëse marrim parasysh se tamponët apo edhe testet serologjike nuk kanë 100 % siguri në zbulimin e një të infektuari, çfarë mund të sugjeronte një biolog si Et'hem Ruka, nëse do të ishit pjesë e Komitetit Teknik i Ekspertëve. "Për mua modeli më i mirë përsa i përket testimeve është ai i Gjermanisë që ka një popullatë të moshuar. Edhe unë mendoj se sa më shumë teste të bëjnë aq më mirë është. Unë nuk di të them nëse janë bërë teste mjaftueshëm në vendin tonë dhe sa është çmimi i tyre. Mirë është që ta dimë të gjithë duke bërë një test edhe pse nuk jemi të garantuar nga ky test. Përgjithësisht, Shqipëria ka ndjekur këshillat e OBSH. Për mua ajo që është interesante është që të bëhen testet për të kuptuar nëse njerëzit e kanë kaluar këtë sëmundje dhe a ka lënë ai imunitet në trupin e tyre. Këto teste janë duke u zhvilluar dhe besoj se dhe në Shqipëri do vijnë shumë shpejt. Dhe ne atëherë do heqim një kuriozitet sepse unë jam i bindur se shumë prej nesh e kanë kaluar këtë sindromë. Këto teste do të ishin shumë të rëndësishme për të qetësuar njerëzit nëse e kanë kaluar koronavirusin."- tha biologu Et'hem Ruka.