Në rrethanat e pandemisë, kur të gjitha vendet, përfshirë Shqipërinë, u izoluan për një periudhë të gjatë, automjetet nuk lejoheshin dhe kur koha e lejes për pazar ishte shumë e ngushtë, njerëzit gjetën si zgjidhje të domosdoshme biçikletën. Në Tiranë kur del rrugëve duket qartë rritja në masë e përdorimit të biçikletave në radhët e të gjitha moshave. Të paktën në Tiranë ku janë shtuar së fundmi korsitë e biçikletave në një kohë të shkurtër, kjo duket se lidhet drejtpërdrejtë me një rritje të kërkesës për biçikleta në treg. Shumë njerëz, që i mbanin biçikletat prej vitesh nëpër ballkone apo bodrume, dhe që për vite të tëra nuk i përdornin, i shpluhurosën ato dhe i çuan për riparime tek ustallarët, si zona e Pazarit të Ri, ndërsa një pjesë tjetër u derdh nëpër dyqane për të blerë biçikleta thuajse për të gjithë familjen. Që në muajin maj u vu re trefishimi i importit të biçikletave në Shqipëri, por që ende nuk arrin të plotësojë nivelin e lartë të kërkesës në treg. Ndërkohë tregu global i biçikletave është vlerësuar 51, 44 mld dollarë me një rritje prej 4,44 mld dollarë nga viti 2018. Sipas parashikimeve globale, ky treg deri në 2024 pritet të rritet me 7,78%. Të ardhurat nga tregu i biçikletave në Evropë pritet të trefishohen deri në fund të vitit 2020 krahasuar me dy vjet më parë. Gjermania është deri tani tregu më i madh i biçikletave në Evropë, me 1.36 milionë biçikleta elektrike të shitura në vitin 2019 – më shumë se dyfishi i numrit krahasuar me tre vjet më parë. Për krahasim, 3.6 milionë makina u shitën në vend vitin e kaluar, dhe tregu ka rënë 35% në gjysmën e parë të vitit 2020. Sipas Federatës së Çiklistëve Evropianë, bllokimi prej pandemisë bëri që autoritetet në 32 nga qytetet më të mëdha të Bashkimit Evropian të bëjnë përmirësime të planifikuara. Belgjika, Danimarka dhe Hollanda janë pionierë të korsive të shpejta të krijuara për pedaluesit