Java që lamë pas duket se ka qenë shumë optimiste përsa i përket numrit të rasteve të reja me Kovid-19, të cilat në fakt nuk kanë të larta nëse bëjmë një krahasim me javët e mëparshme. A e ka kaluar më e keqja për Shqipërinë dhe piku i rasteve?. Dr. Ilir Alimehmeti, epidemiolog klinik, tha se nga të dhënat zyrtare duket sikur vendi ynë nuk e ka pasur një pik të virusit Sars-Kov2 "Nëse ne shohim të dhënat e Ministrisë së Shëndetësisë, Shqipëria nuk ka pasur një pik të vërtetë sepse këto të dhënat janë pak a shumë njësoj por nëse duke iu referuar këtyre të dhënave mund të themi se prej datës 6 prill, ka filluar një rënie e lehtë e rasteve aktive. Por kjo varet shumë nga metodologjia e përdorur për gjetjet e këtyre rasteve sepse dihet që ne nuk po ndjekim një politikë të gjetjeve të rasteve në komunitet pra të shkojmë të bëjmë testime në zona të caktuara dhe të testojmë masivisht por ndjekim politikën e gjurmimit epidemiologjik."- tha ai. Në fakt gjatë gjithë këtyre ditëve pavarësisht argumenteve të ndryshme mes epidemiologëve, mjekëve infeksionistë se a duhet të vazhdojë karantina, a duhet të jenë kaq kufizuese masat, ka pasur një mendim të njëjtë: Shqipëria pritet që gjatë këtyre javëve të ketë një rënie të kurbës së rasteve, duke shkuar ndoshta në fillim të majit vetëm me raste sporadike. Por si paraqitet situata, a duhet të vazhdojmë të tregojmë një kujdes maksimal dhe sa do të na duhet të bashkëjetojmë me këtë situatë? Këto pyetje por edhe të tjera i diskutuam gjithashtu këtë mëngjes me Dr. Shk. Ilir Alimehmeti, epidemiolog klinik, Fakulteti i Mjekësisë, Tiranë.