Si ka qenë ecuria e epidemisë së Kovid-19 në Shqipëri, në raport me masat që janë marrë këtu e para 5 javësh? Çfarë duhet të ndryshojë apo jo, në këtë fazë të epidemisë? Cili do të jetë roli i testeve të reja që planifikohen të kryhen? Të gjitha këto pyetje na vijnë ndër mend ndërkohë që pardje patën vetëm 6 raste të reja të infektuarish, ndërsa dje 17 raste pozitive. Autoritetet thonë se kurba po ulet, ndërsa shumë prej nesh e kanë kuptuar këtë si një dritë në fund të tunelit të zbutjes së masave shtrënguese dhe karantinimit. Por a është vërtet kështu? Indrit Seferi, epidemiolog, pedagog Fakulteti i Mjekësisë thotë se nuk duhet të gëzohemi para kohe. Sipas tij kanë qenë masat e marra në kohë që kanë ndikuar në ecurinë e shpërhapjes së këtij virusi në vendin tonë. "Kjo është dhe arsyeja që përgjithësisht shpërhapja e këtij virusi ka qenë brenda familjes në vendin tonë. Duke qenë se izolimi brenda familjes ka qenë më i vështirë për tu bërë"- tha epidemiologu Seferi.