Qëndrimi në izolim për një kohë të gjatë po ndikon gjerësisht më mënyrën se si ne komunikojmë me të tjerët. Tashmë jemi të privuar nga kontaktet e drejtpërdrejta, nga takimet apo bisedat e gjata ballë për ballë duke u fokusuar vetëm tek kontakti me anëtarët e familjes dhe tek ai virtual përmes teknologjisë. Në këndvështrimin e ekspertëve të komunikimit, në këtë situatë po vihet re një ngjashmëri me mënyrën se si komunikohet në institucionet e mbyllura të vuajtjes së dënimit. Të burgosurit komunikojnë përmes telefonit, tashmë edhe përmes video-call në skype, po ashtu ndjekin edhe mediat për t'u informuar. Pra, duket se edhe ne të tjerët që jemi në izolim në shtëpi, aktualisht mund të shfrytëzojmë mundësi të kufizuara komunikimi. Padyshim, e gjithë kjo periudhë që nuk dihet me siguri se sa do të zgjasë, do të na ndikojë edhe në të ardhmen"Teknologjia nuk e zëvendëson kontaktin social. Ne jemi praktikisht në arrest shtëpi në aspektin literal të fjalës dhe pak rëndësi ka se ku jemi izoluar, në shtëpi, në hotel apo kudoqoftë. Në momentin që nuk kemi lirinë për të bërë atë që duam dhe për të takuar njerëzit që duam, pasojat dhe ndikimet psikologjike që do të kemi janë të rënda, pavarësisht pransië së teknlogjisë në komunikim. Karantinimi do të na shpëtojë nga korona por do të shtojë pacientët e sëmundjeve mendore. Ky izolim nëse vazhdon gjatë patjetër do të jetë pasoja të dukshme dhe në masë në shëndetin mendor jo thjesht nga izolimi por edhe nga problematikat social-ekonomike që do të shoqërojnë izolimin. Unë kam mendimin që izolimi këtu është pak më i ashpër dhe ekstrem se në vendet e tjera. Ndaj qeveria pasi të dalim nga ky izolim duhet të ketë një strategji edhe për këtë gjë. "Vrasja" më e madhe e njeriut është izolimi psikologjik"- tha Zylyftar Bregu pedagog i komunikimit në Fakultetit e Gazetarisë.