E dini që mund të jeni duke përdorur deri në 50% më shumë detergjent se sa duhet? Përdorimi i tepërt i detergjenteve kushton më shumë pará, prish lavatriçen, nuk lejon larjen e duhur. Si pasojë më shumë detergjent do të mbetet në rroba duke u bërë shkaktar alergjish edhe në fund ndot mjedisin. Një grup inxhinierësh mjedisi dhe ekspertësh të fushave të tjera, të grupuar prej kohësh nën emrin ENFORCE, kanë matur fortësinë e ujit në Tiranë dhe japin sugjerimet e tyre për dozimin e saktë të detergjentit në lavatriçe, i cili është një nga ndotësit kryesorë të lumenjve. “ENFORCE” është një grup ekspertësh të pavarur, të përkushtuar për zhvillimin e qëndrueshëm. Shume prej tyre kanë Master në Inxhinierinë e Mjedisit. Në vitin 2020, ata krijuan organizatën e tyre në kuadrin e programit CIM, të mbështetur nga Qeveria Gjermane. Ky projekt është i fituar nga OASA (Organizata e Studentëve edhe Alumnit Shqiptarë në Berlin) dhe po implementohet nga ENFORCE edhe Shoqata e Bujqësisë Organike) që ndodhet në Tiranë. I ftuar në studion e Wake Up për këtë çështje, Ing. Lulzim Baumann, ekspert mjedisi tha për Wake Up në Top Channel se dhe zbutësi për rrobat që ne përdorim është i panevojshëm madje është shumë i dëmshëm për shëndetin tonë pasi për prodhimin e tij përdoren jo vetëm kimikate por dhe dhjami i kafshëve të ngordhura.