Nga dje (1 prill) ka nisur aplikimi i subjekteve të vogla, me qarkullim deri në 14 milionë lekë, për të përfituar pagën minimale, apo të ashtuquajturën “pagë të luftës”. Në total është deklaruar zyrtarisht se përfitojnë 60 mijë të punësuar/vetëpunësuar, nga 176 mijë që janë gjithsej, ose rreth 34% e të punësuarve gjithsej në subjektet e vogla. Individët e punësuar, që rezultojnë në më shumë se një listë pagese, përfitojnë si ndihmë financiare vetëm një pagë minimale. Ndërkohë që nuk përfitojnë as personat që zhvillojnë aktivitet në informalitet. Paketa e parë e ndihmës financiare pritet të pasohet nga një e dytë, ndërkohë që si ekonomistët, si bota e biznesit ka shumë vërejtje për qasjen dhe format me të cilat janë zgjedhur që të përballet kriza nga koronavirusi.