Edita Tahiri, politikane dhe diplomate me një karrierë të gjatë, ka folur sot në "Wake Up" për arritjen e saj më të fundit, pasi është renditur në listën e 1000 grave që kanë punuar për paqen. Ajo është vlerësuar nga Rrjeti i Grave për Zhvillimin e Paqes (WWPN), duke u prezantuar në ballinë përkrah ish-presidentes së Liberisë dhe fitueses së çmimit Nobel. "Ka një angazhim më të madh për të njohur rolin dhe vlerat e grave për paqen dhe për të ndalur luftërat. Ajo që më gëzoi po ashtu është edhe prezantimi në ballinë sepse është një vlerësim edhe për Kosovën"-u shpreh Edita Tahiri. Për të qenë pjesë e kësaj liste ka shumë kritere që ndikojnë dhe sipas Editës, formimi akademik dhe rezultatet praktike janë më kryesoret. Ndër të tjera ajo tregoi se edhe pse në fillimet e saj në politikë ka qenë e vetme, asnjëherë nuk e ka ndjerë diskriminimin sepse qëllimi ka qenë i përbashkët për të luftuar okupatorin serb. Fakti që i kanë besuar edhe pozicionin e Ministres së Jashtme e tregon më së miri këtë gjë. "Unë edhe në kohën e luftës i kam mobilizuar gratë. Ardhja ime në politikë ka qenë përmes një proteste ku u bashkuam mbi 5000 gra. Gratë kanë dhënë një kontribut historik për Kosovën"-u shpreh Edita. Aktualisht ajo është edhe kryetare e Lobit Rajonal të Evropës Juglindore që punon për paqe dhe për barazi gjinore.