"Nëna Parti" quhet grupi muzikor i cili duket se ka guxuar jo vetëm me emrin që ka zgjedhur por edhe me titujt apo stilin e muzikës që bëjnë. Klejd Guza dhe Eduina Aliçka janë dyshja e parë në Shqipëri që ka sjellë një rrymë mjaft të veçantë muzikore dhe bëhet fjalë për “Vaporwave” dhe “Synthwave”. Kënga e tyre më e fundit vjen me titullin provokues “God fell in love with a stripper”. Aristët e rinj kanë vendosur që të sjellin një evokim të periudhës së komunizmit, por sigurisht me nota sarkastike. Projekti me i ri “God fell in love with a stripper” tregon një histori fiktive, të shkruar nga Fabio Çani, ku Zoti kap vështrimin e Evës duke kërcyer dhe aty i zgjohen anë dhe ndjesi të dobëta, të cilat shkojnë krejtësisht kundër përfytyrimit që çdokush ka për të. Një prej pjesëtarëve të grupit, Klejdin, e kemi në studio, ndërsa Eduinën e kemi në skype. Nëna Parti lindi si projekt eksperimental mes dy miqve (Klejd Guza dhe Eduina Aliçka) në fillim të 2017-ës si një përpjekje për të sjellë disa rryma muzikore që ishin të përhapura në vendet perëndimore në vitet '80. EP-ja e parë e bandës titullohet “Outrun P.P.Sh” (Lër pas P.P.Sh.), përmban 4 këngë të ndikuara thellësisht nga ritmet “synthwave” të viteve 80′ dhe fjalime të mbivendosura të Enver Hoxhës për të krijuar një efekt nostalgjie, e cila nuk ka ekzistuar në Shqipëri. Ndërsa EP-ja e dytë “Brief Glimpses of Beauty” (Shfaqje të shkurtra të së bukurës) tregon një histori të shkurtër në 4 këngë: bukuria dhe humaniteti shfaqen dhe në periudhat më të errëta. Vizualet e krijuara me mjeshtëri nga artisti Xhon Dervishi tregojnë njç Enver në stilin Cyborg (njeri i ndërthurur me makinë).