Pak ditë më parë, Serena Leka është vlerësuar me ҫmimin e parë në Samitin Botëror të Inovacionit, në një event në fushën e sipërmarrjeve dhe startup-eve. Produkti i krijuar prej saj ka si qëllim që të kufizojë përdorimin e plastikës në paketim. "Cellugy" është kompania në të cilën ajo punon dhe në emër të kësaj të fundit është krijuar edhe ky produkt. Përveҫ Serenës, të angazhuarit e tjerë në këtë projekt janë nga vende të ndryshme të botës. Momentalisht ajo është në New York për disa projekte por edhe për të pushuar dhe do të jetë aty deri në 2 janar. 26 vjeҫarja me origjinë nga Fushë-Arrëzi është e vetmja studente shqiptare që ka fituar një bursë prej 50.000 euro nga Mbretëria Daneze, si edhe ka qenë pjesë e grupit bërthamë të studentëve ekselentë nga mbarë bota. Serena ka kryer studimet master në Danimarkë në Universitetin e Aarhusit, aty ku më pas është punësuar si menaxhere projektesh. Temën e diplomës e ka përgatitur në bashkëpunim me një nga firmat më të fuqishme për industrinë inxhinierike, me më shumë se 25.000 punonjës në mbi 100 shtete në bote, "Danfoss A/S". Ajo ka pasur mundësinë që të udhëtojë në më shumë se 15 vende të botës dhe po ashtu ka qenë Drejtoreshë Ekzekutive e rrjetit të studentëve ekselencë në Tiranë.