Shumë njerëz gjejnë njëmijë justifikime për të mos e mbajtur maskën. E vendosin atë në qafë, në krah, nëpër xhepa, në çantë apo kudo tjetër përveçse aty ku duhet për t'u mbrojtur. Së fundmi është bërë një studim nga shkencëtarët në Brazil lidhur me rezistencën që bëjnë njerëzit ndaj masave Anti-Covid, sikurse është mbajtja e një maske. Ky studim është i pari i këtij lloji në Amerikën Latine dhe anketoi mbi 1500 njerëz të moshës 18-73 vjeç. Kundërshtimin për të vendosur maskën ekspertët e lidhin me tiparet e Çrregullimit të Personalitetit Anti-Social. Përmes një pyetësori, u identifikuan dy profile: një profil antisocial, ku njerëzit ishin rezistente ndaj masave të sigurisë Covid-19 dhe një profil modeli empatie. Profili antisocial lidhej më shumë me rezultate më të larta në pyetjet e personalitetit që kishin të bënin me "pashpirtësinë, mashtrimin, armiqësinë, impulsivitetin, papërgjegjësinë, manipulimin dhe marrjen e rrezikut" të cilat janë tipike për Çrregullimin e Personalitetit Antisocial. Ndërsa profili i modelit empatik lidhet më shumë me tendencën për të përjetuar të njëjtin ndikim apo emocion, teksa sheh një ngjarje që ndikon apo prek emocionalisht dikë tjetër. Edhe në Shqipëri ne kemi vënë re shumë qytetarë që nuk i vendosin maskat, ndonëse mund t'ju jetë tërhequr vëmendja ose mund të jenë gjobitur nga policia. Tipike janë edhe rastet që e ngrenë maskën sipër gojës sapo shikojnë policët në rrugë. Pra, më shumë e vendosin nga frika e gjobës sesa nga ajo për shëndetin e tyre. Për t'i analizuar më shumë këto sjellje e diskutuam sot me Prof. Edmond Dragotin.