Përtej punës së policisë në terren, janë edhe vetë qytetarët të cilët telefonojnë në numrat e policisë për të denoncuar rastet kur ata që duhet të jenë në karantinë dalin nga banesat e tyre apo kur lëvizin jashtë orarit 05:00-13:00 apo dhe për konflikte apo mosmarrëveshje mes komshinjve. Drejtori i Rendit Publik Albert Dervishaj duke falenderuar qytetarët për bashkëpunimin që kanë pasur këto kohë me Policinë e Shtetit tha se nga data 17 mars dhe deri sot (1 prill) në numrat që Policia e Shtetit ka vënë në dispozicion të qytetarëve 112 dhe 129 kanë mbërritur rreth 1 milionë telefonata nga qytetarët në karantinë. "Kemi pasur gjatë 2 javëve të fundit një fluks të madh telefonatash te nr 112 dhe 129, rreth 1 milionë telefonata nga shtetas të ndryshëm. Nga telefonatat e marra; 15 mijë njoftime janë për konflikte dhe mosmarrëveshje të cilat duhet thënë se kanë ardhur në ulje. Ankesa për zhurma dhe shqetësime nga komshinjtë janë 102 njoftime dhe për persona që kanë dalë pa autorizim apo grumbullime njerëzish janë 135 raste"- tha Dervishaj. Ndërkohë që fluks të madh kërkesash ka pasur edhe për drejtuesit e automjeteve të cilët kërkojnë autorizim për të lëvizur me makinat e tyre. "Nëpërmjet sistemeve të autorizimit të hapura me 17 mars nga 171982 vetëdeklarime nga shtetas të ndryshëm janë dhënë 112211 autorizime të cilat janë përpunuar nga strukturat e policisë së shtetit në mënyrë automatike dhe manuale"- tha Dervishaj.