Një koncept i ri në praktikë për shoqërinë shqiptare, i cili duket se po gjen gjithnjë e më shumë terren për t’u zhvilluar, është zgjidhja e mosmarrëveshjeve përmes ndërmjetësimit. Sipas Dhomës Kombëtare të Ndërmjetësve, ky skenar kursen kohë dhe kosto për individët, si edhe bizneset që kanë çështje civile. Mosmarrëveshjet e shumta me natyrë familjare, civile apo tregtare, që vihen re në jetën e përditshme, prej kohësh kanë vënë në vështirësi institucionet e drejtësisë. Përballë numrit gjithnjë në rritje dhe pamundësisë së zgjidhjes në kohë të tyre, lind nevoja e zgjidhjeve alternative ndaj gjyqit, i cili sjell kosto të larta. Largimi i mosmarrëveshjeve të vogla nga sallat e gjykatave është një prej synimeve themelore edhe të Reformës në Drejtësi. Ligji për ndërmjetësimin ligjor ka për qëllim që këto përplasje të vogla gjyqësore, deri 1 milion lekë të zgjidhen në zyrat e ndërmjetësuesve dhe jo më në gjykata. Me ndryshimet ligjore synohet që të largohen nga sallat e gjykatave 70% e volumit të çështjeve. Dhe konfliktet e shtuara sociale sidomos gjatë kësaj pandemie, duket se janë shtuar të gjejnë zgjidhje në dyert e ndërmjetësve... Gjatë katër viteve, rreth 10 mijë persona kanë preferuar të mos u drejtohen gjykatave për të zgjidhur konfliktet e tyre, por t’i zgjidhin përmes ndërmjetësimit. Bëhet fjalë për mosmarrëveshje të tilla që nga mosrespektimi i kontratave të punës, për markat tregtare, deri te çështjet me të dëmtuar akuzues, kryesisht për veprën e shpifjes dhe rrahjes. Në vitin 2019 Ministria e Drejtësisë kishte të licensuar 143 persona si ndërmjetës nga të cilët 141 persona fizikë dhe 2 persona juridikë. Por ky numër ka ardhur në rritje, për vetë interesimin e ndërmjetësuesve të rinj.