Ajo prej 11 vitesh jeton në Itali dhe shërben në sistemin mjekësor të këtij vendi. Quhet Romina Selenica dhe shërben si Mjeke e Përgjithshme e profilizuar në kirurgji. Ditën e hënë, (9 mars) kur në vendin tonë u konfirmua rasti i parë i prekur me koronavirus ajo ka bërë një mesazh sensibilizues në shqip, një mesazh ndërgjegjësimi e jo alarmimi, duke u shprehur se ka qenë e pashmangshme që vendi ynë të mos prekej nga koronavirusi. Video e saj u bë virale pasi ajo bën thirrje që gabimet e Italisë të shërbejnë për shqiptarët si një leksion, për të shpëtuar jetën e të gjithëve. Në një lidhje skype me Wake Up, Dr. Selenica tregoi vështirësitë me të cilat ajo dhe stafi mjekësor përballen çdo ditë. "Është një fluks i madh që ne po përpiqemi ta përballojmë me të gjitha forcat tona. Gabimi që ne bëmë ishte se kur u konfirmua pacienti zero në Padova izoluam vetëm atë dhe jo familjarët, miqtë apo njerëzit rreth tij dhe kështu virusi u përhap. Ju bëj thirrje që të mos bëni të njëjtin gabim që bëri Italia" -tha ndër të tjera Dr. Romina Selenica e cila dha përmes skype dhe mesazhe shumë të rëndësishme në luftën tonë kundër virusit Covid 19-të.