Kemi hyrë në javën e fundit të muajit prill dhe që prej 9 marsit Shqipëria tashmë është në një periudhe që po kalon nën masa drastike dhe karantine, sidomos gjatë fundjavave. Java që lamë në fakt edhe pse autoritetet e shëndetësisë deklaruan se jemi në një gjendje të qëndrueshme të përhapjes së virusit Kovid-19 në fakt nuk qe dhe shumë e mirë përsa i përket shifrave të reja të infektimeve. U shënuan ditë me radhë me 25-29 të infektuar, por pati edhe një zgjerim të vatrave. Hartës së të prekurve ju shtua Kruja, ndërkohë që në Tiranë pati një shpërthim të ri vatre, në një nga institucionet e vuajtjes së dënimit( burgu 313) ku u shënuan brenda një dite, 13 raste me Kovid-19. Pak javë më parë epidemiologët por edhe mjekët thanë se rastet do të ishin në rënie, por shifrat duket se janë "kokëforte". Për të komentuar rreth ecurisë së epidemisë, situatës në spitalin infektiv këtë mëngjes ishim në lidhje skype, mjekun infeksionist Pëllumb Pipero. "Në këtë fazë të epidemisë indikator i rëndësishëm është ai i shtrimeve në spital që dëshmon rastet që konstatohen nuk janë të sëmurë klinikisht dhe ata që kanë shenja klinike janë shumë më të pakët të shtruar në spital kësisoj ecuria është jo vetëm e butë por dhe nën kontroll. Këta numra që dalin pozitivë të s'duhet të na frikësojnë sepse pjesa më e madhe e tyre janë asimptomatikë. Nëse ne kemi 15 raste pozitive por asnjë në spital kjo do të thotë se epidemia është nënë kontroll dhe nuk ka vend për alarm. Theksoj se pas çdo rasti klinik me Kovid-19 fshihen 10-15 raste të reja asimptomatikë që janë pozitivë. Por në rastin kur këto shifra nuk na sjellin numra të shtuar të shtruar në spital, do të thotë që ecuria e epidemisë vazhdon të jetë e qëndrueshme me ritme rënëse përsa i përket gravitetin dhe ngarkesës. Nga ana tjetër duke u shtuar gradualisht ekspozimi njerëzit bien në kontakt, me virusin krijojnë imunitet në mënyrë të heshture dhe janë të mbrojtur."- tha Pipero.