Pas SHBA-së, Spanja, është vendi i dytë me numrin më të madh të rasteve dhe të viktimave nga koronavirus, ku përgjatë ditëve të fundit është raportuar nga autoritetet spanjolle për rënie të rasteve të reja, që nga fillimi i shpërthimit të këtij virusi. "Dua të vë në dukje një element tjetër që është vënë re në Spanjë. Në jug të Spanjës ne kemi 7 herë më pak infeksion ndaj këtij virusi dhe mendojmë se kjo mund të jetë e lidhur me temperaturat. E njëjta gjë është vënë re edhe në Greqi; shpërndarja e virusit është më pak në zonat e ngrohta. Edhe po të shohësh hartën e përhapjes së virusit në Shqipëri sheh që Saranda apo Gjirokastra nuk janë prekur, pra në përgjithësi jugu është prekur më pak nga infeksioni. Kjo është një teori e diskutueshme por që Instituti Mjekësor i Emergjencës këtu në Spanjë në bashkëpunim dhe me Institutin Meteorologjik po e studiojnë. Ata kanë nxjerrë disa të dhëna që vendet me temperatura më të larta kanë virulencë më të dobët."- tha mjeku Kita Sallabanda Diaz i cili jeton dhe punon në Spanjë.