Ekspertët e Shëndetit Publik vazhdojnë testimet duke gjurmuar rastet që shfaqin shenja klinike por edhe të dyshuar me Covid19. Shtete të ndryshme që po përballen me situatën po përdorin skenarë të ndryshëm përsa i përket depistimit të popullatës , por edhe masave të marra për ta ndaluar në kohë. Pyetja e të gjithëve është se numri i të prekurve në Shqipëri a është real , apo në të vërtetë numri është më i madh dhe duhet të kryhen më shumë testime nga ana e Shëndetit Publik. Ndërkaq vende të ndryshme po aplikojnë teste të cilat i nxjerrin shumë shpejt rezultatet nëse je i prekur apo jo. Eksperti i Shëndetit Publik, Dr Erion Dasho gjatë kësaj periudhe i është bashkuar ekipit të ekspertëve shëndetësorë, pasi ai është Drejtor i Shëndetit Digjital dhe Inovacionit pranë një kompanie në Frankfurt. "Ne kemi sot një numër rastesh që për mendimin tim nuk konsiderohet piku por konsiderohet një zhvillim normal i epidemisë si pasojë e masave të hershme që kemi marrë. Sot ne jemi në situatën që me këto masa që janë marrë arritëm të shmangnim një katastrofë. Në vendin tonë virusi ka një kuadër normal. Numri i rasteve është i menaxhueshme për strukturat tona dhe ne kemi mjek infeksionist shumë të mirë që treguan veten se janë heronjtë e heshtur të mjekësisë dhe po bëjnë një punë të shkëlqyer"- tha ndër të tjera mjeku Erion Dasho.