Gjatë kësaj periudhe të pandemisë nuk kanë qenë të pakta rastet e njerëzve që kanë denoncuar shumat e mëdha të parave që kanë paguar për mjekimet që ju kanë përshkruar mjekët. Për këtë problematikë të ngritur, qeveria fillimisht miratoi një fond prej 1.2 miliardë lekë për të rimbursuar ilaçet për kurim nga COVID për çdo qytetar në Republikën e Shqipërisë, ndërkohë që ka vendosur edhe se si do të bëhet ky rimbursim. Ajo që është e rëndësishme të thuhet është se pacientët që do t'i drejtohen mjekut të familjes dhe që janë të konfirmuar si pozitiv me SarsCov2 do të marrin medikamente falas. Për ata persona që kanë pasur forma të lehta të COVID rimbursimi është 1650 lekë, ndërsa për ata që kanë pasur shenja në formë të moderuar vlera e rimbursimit është 10900 lekë. Po cilat janë medikamentet e përfshira në dy skemat e mjekimit tashmë të miratuara nga autoritetet shëndetësore, si po e përballojnë mjekët e familjes këtë situatë pandemie? Këtë mëngjes në studion e Wake Up, mjekja Bruna Shiroka e cila shërben pranë qendrës shëndetësore numër tre në Tiranë shpjegoi skemën e rimbursimit; cilat kategori përfitojnë nga kjo skemë dhe cila përjashtohet.