Një fenomen shqetësues në Shqipëri janë rastet e pacientëve të shtruar në spitale me Covid, të cilët kanë kryer ose kanë tentuar vetëvrasje. Rasti më i fundit ishte dje, këtë herë në spitalin e QSUT-së ku një pacient i shtruar 69 vjeçar u hodh nga kati i dytë. Po ashtu edhe më herët ka patur tre raste të tjera vetëvrasjesh tek spitali "Shefqet Ndroqi". Mjekë të ndryshëm që merren me shëndetin mendor dhe që punojnë në spitalet Covid në mbarë botën, kanë treguar se ilaçet që e trajtojnë këtë sëmundje mund të shkaktojnë haluçinacione ose të nxisin prirjet për vetëvrasje. Gjendja e rëndë psikologjike që kalojnë këta pacientë i bën që ta përjetojnë dyfish më keq sëmundjen në fjalë. Arlinda Cerga, Drejtuese e Shëndetit Global në "Public Health England" drejtuese e studimeve shkencore për shëndetin mendor tha se ky nuk është vetëm fenomen shqiptar dhe që rastet e vetëvrasjeve kanë ndodhur he në vende të ndryshme të botës. "Fatkeqësisht këto raste nuk po ndodhin vetëm në Shqipëri por dhe në vende të ndryshme të botës. Në Shqipëri ndodh që bëhen mediake, ndërkohë që në vende të ndryshme të botës këto raste nuk pasqyrohen në media. Shqipëria dhe India për fat të keq i japin një vëmendje tepër të fortë mediatike vetëvrasjeve duke krijuar në mënyrë të pavetëdijshme një cikël imitimesh të vetëvrasjeve. Është pjesë e udhëzimeve që vetëvrasjeve nuk u jepet vëmendje mediake për shkak të efektit domino të imitimit. Në raste të tilla duhet të jepet sa më pak informacion, nuk duhet të jepen detaje. Nëse vini re rastet në Shqipëri nga rasti i parë e deri tek i fundit janë meshkuj dhe të gjithë janë hedhur nga lartësitë e ballkonit"- tha Cerga.