Rekomandimet e Organizatës Botërore të Shëndetësisë por edhe të shkencëtarëve, mjekëve të njohur nëpër botë gjatë gjithë kësaj periudhe për tu mbrojtur nga virusi Kovid-19 kanë qenë për përdorimin e maskave dhe dorezave si dhe dezinfektuesve. Por nëse të gjithë po përpiqemi të mbrohemi individualisht, ka dhe një problem që prek mbarë shoqërinë jo nga përdorimi i tyre por nga mënyra se si menaxhohen mbetjet që ato lënë pas. Kovid-19 solli një përmirësim të cilësisë së ajrit, si pasojë e reduktimit të lëvizjes me makina, apo se industritë prodhuese e kanë ndalur aktivitetin apo reduktuar atë në disa orë. Por nëse kjo është ana e mirë e medaljes ka dhe një anë tjetër që na lajmëron se jemi në rrezik. Mjedisi, ujërat e deteve, lumenjve po ndoten gjithë e më shumë nga hedhja pa kriter e dorezave plastike, pecetave të lagura, nga shishet e dezinfektuesve. Mbetjet që gjenerohen nga përdorimi i këtyre produkteve janë ndeshur së fundmi jo vetëm pranë zonave të banuara, apo në shtete të njohura nga Neë York deri në Londër, Itali, Francë etj por edhe në ishujt të pabanuar nga njerëzit. Ambientalistët e Oceans Asia gjetën në ishujt e pabanuar Soko që gjenden disa milje detare larg prej Hong Kongu, 100 maska, çka tregon se si përfundojnë këto mbetje dhe se sa të rrezikshme janë për mjedisin që na rrethon. Kjo situatë në fakt nuk është e panjohur për vendin tonë. Në jo pak raste në media janë bërë publike pamje të dorezave, maskave, shisheve plastike që hidhen vend e pa vend.... Por sa po e rrezikojmë mjedisin, situatë e cila në vitet e ardhshme do të na kthehet sërish kundër e biseduam me Rodion Gjoka, ekspert mjedisi pranë CoPLAN