Wake Up/ Dënohen ata që fotografojnë poshtë fustanit të grave. Dy gazetare iniciuan ligjin e veçantë

Fenomeni i fotografimit apo filmimit të vajzave, grave pa pëlqimin e tyre poshtë veshjeve, duket se ka vënë në lëvizje autoritetet gjermane të cilat e kanë vlerësuar si një shkelje të turpshme të privatësisë por edhe si ngacmim seksual. Për këtë arsye Asambleja Federale dhe ajo e shtetit kanë miratuar një draft, i cili do t'i dënojë këto veprime jo vetëm me gjobë por edhe me heqje të lirisë së personave, dënim që shkon në 2 vjet burg. Por ligji nuk ndalet me kaq, do të tregohet i ashpër edhe me ata që fotografojnë dhe më pas i postojnë në rrjetet sociale, fotot e viktimave apo të të lënduarve gjatë aksidenteve. Mesa duket ky është një fenomen i përhapur në Gjermani. Anila Shuka, gazetare e DW, tha se vetëm në Mynih evidentohen 2 raste në muaj. "Kanë qenë dy gazetare që nisën një peticion online ku mblodhëm mbi 10 mijë nënshkrime pikërisht për këtë fenomen. Një nga gazetaret ishte përballur vetë me këtë fenomen ndaj mori këtë inisiativë"- tha gazetarja Anila Shuke nga DW. Ajo tregoi dhe rastin konkret të një kryetari bashkie, të cilit iu kapën një sërë fotosh të tilla dhe nuk kishte ligj për ta dënuar. Ligji është përkrahur dhe pritur shumë mirë nga qytetarët gjermanë.