Jemi në prag të festave të fundvitit dhe sigurisht vëmendja drejtohet për nga siguria ushqimore. Kohët e fundit, kanë mjaftuar dy denoncime anonime në rrjetet sociale për mënyrën se si prodhohen sallamet në Shqipëri dhe kaq mjaftuar për të ri ngritur alarmin publik. Denoncuesi i parë shprehej se kompanitë më të njohura të përpunimit të produkteve të mishit në Shqipëri, fusin produktet e tyre në treg nga mishi i kafshëve të ngordhura. Ndërsa denoncuesja e dytë ka rrëfyer se çfarë ndodhte brenda fabrikave të përpunimit të mishit. Sipas saj, sallamërat dhe proshutat mund të përmbajnë vetëm 1% mish, ndërsa pjesa tjetër përbëhet nga gjëra nga më të çuditshmet. “Mish i prishur, mish që bie përtokë e më pas hidhet sërish në makineritë e përpunimit, erëza speciale, ku çfarëdo produkti të futësh brenda, konsumatorit i duket si mish i vërtetë”, shprehej ndër të tjera denoncuesja. Por a është kjo situata? Dhe për më shumë, në kushtet kur njerëzit kanë mosbesueshmëri të lartë përsa i përket sigurisë ushqimore, si t’a dallojmë një sallam cilësor nga një jocilësor?