Prej datës 19 nëntor tek sheshi mes Ministrisë së Bujqësisë dhe asaj të Financave (mbrapa Katedrales Ortodokse) është inaguruar vepra e artit publik “Bukurshkrimi” e artistit Adrian Paci. “Bukurshkrimi” paraqet; Një bankë te vjetër shkolle dhe dy fletë bronzi të mbështetura mbi të. Mbi fletën e parë janë disa shënime që nuk janë fjalë, por pikënisje e një artikulimi, ndërsa mbi fletën tjetër lexohen të shkruara bukur disa fraza: “Tirana është kryeqyteti ynë”, “Në Tiranë jetojnë udhëheqësit tanë të dashur”, “Tirana po zbukurohet dita-ditës”. Në fakt për herë të parë vepra "Bukurshkrimi" është prezantuar në Galerinë Kombëtare të Arteve në Tiranë vitin e kaluar ku fletët e fletores së klasës së parë të Adrian Pacit u ekspozuan të vendosura në korniza në murin e Galerisë Kombëtare si pjesë e një ekspozite personale të autorit. Por tani "Bukurshkrimi" ka dalë jashtë mureve të galerisë si nj instalacion. Tani fletët e fletores së klasës së parë të Adrian Pacit janë shndërruar në fletë bronxi dhe janëvendosur mbi një bankë të vjetër. Tani kjo vepër i përket publikut, por mesazhi në fund mbetet i njëjtë: Manipulimi që pushteti i bën mendësisë së njeriut me forcën e propagandës. Kjo vepër është e para ndër disa, pjesë e një projekti të “Harabel” që ka si qëllim vendosjen e publikut në ndërveprim të afërt me artin bashkëkohor dhe krijimin e një dialogu të hapur mes hapësirës urbane dhe artit. Në një lidhje direkte artisti Adrian Paci, nga Art Haouse në Shkodër foli për mesazhin e veprës së tij por dhe për marrëdhënien e artistit me pushtetin.