Nga data 18 - 27 shtator në Pattaya të Tajlandës u zhvillua kampionati botëror i peshëngritjes, ku kuqezinjtë u prezantuan me katër sportistë, si Briken Calja, Erkand Qerimaj, Daniel Godelli dhe Krenar Shoraj. Në këtë përballje me kundërshtarët më të fortë të botës shtangisti Calja fitoi medaljen e bronztë dhe u rendit i pesti në botë (konkurim dygarësh) ku arriti të ngrinte lart 337 kg. Kujtojmë se ai garoi në kategorinë e peshave 73 kg. Me këtë paraqitje ai garantoi pjesëmarrjen për në Lojërat Olimpike Verore “Tokio 2020”. Ndërkohë vetëm pak ditë më parë Brikeni ka marrë pjesë në Kupën Mesdhetare që u zhvillua në San Marino, ku mori 1 medalje argjendi dhe 2 bronzi. Por peshëngritësi shprehet se ndjehet pak i vlerësuar në opinionin publik. "Rastet e dopingut në peshëngritje kanë ndikuar në imazhin që ka krijuar publiku dhe mediet për peshëngritësit që marrin medalje. Shihemi me dyshim pas çdo medalje që marrim"- u shpreh peshëngritësi në Wake Up.