Braktisja e shkollës është një nga fenomenet që pas viteve 90' ka ardhur në rritje. Nëse gjatë regjimit komunist ishte e vështirë të braktisje arsimin e detyrueshëm, sot ka mijëra nxënës që ose nuk regjistrohen ose e braktisin arsimin bazë për arsye nga më të ndryshmet. Sipas të dhënave të raportuara nga Ministria e Arsimit, vetëm gjatë vitit shkollor 2016-2017, 1881 nxënës ose 0.5% e numrit të nxënësve të regjistruar në arsimin e detyrueshëm raportoheshin se kanë braktisur shkollën. Në vitin shkollor 2017-2018, MASR raportoi se lanë arsimin e detyrueshëm, 1540 nxënës, ndërsa përgjatë vitin shkollor 2018-2019 ky numër ishte 1602 të mitur që lanë arsimin e detyruar. Përballë kësaj panorame që jep ministria qëndrojnë edhe shifrat e raportuara nga organizatat ndërkombëtare, të cilat janë edhe më të larta. Kështu ndërkohë që Ministria e Arsimit raporton se në vitin shkollor 2017-2018 e braktisën shkollën 1540 nxënës, OBSH raporton se ishin 4085 nxënës që braktisën arsimin e detyruar përgjatë 2018-ës. Në harkun e 8 viteve që prej 2011, numri i nxënësve në ciklin 9-vjeçar është reduktuar me 27%. Por si është realisht situata në vendin tonë, a paraqesin këto shifra një realitet vërtet shqetësues për sistemin tonë arsimor dhe cilat janë arsyet .... Rreth kësaj teme do të diskutojmë me zv.presidentin e Sindikatës së Pavarur të Arsimit, Isa Halilaj ku së fundmi të mbështetur dhe nga organizata më e rëndësishme në fushën e arsimit "International Education" kanë nisur një fushatë për uljen e numrit të nxënësve braktisës dhe atyre në rrezik braktisje. Ndërkohë në bazë të ligjit për arsimin parauniversitar kur nxënësit e moshës 6 deri 16 vjeç, të cilët i përfshin detyrimi shkollor, mungojnë pa arsye në shkollë ose e braktisin atë, prindërit e tyre dënohen për kundërvajtje administrative me gjobë nga 1 000 deri në 10 000 lekë.