Këto muaj të izolimit në shtëpi kanë ndikuar shumë në shëndetin mendor të gjithë secilit, tek dikush më pak e tek një tjetër në mënyrë më të dukshme. Madje në të gjithë botën është vënë re një rritje e numrit të personave që po vuajnë nga ankthi, sulmet e panikut apo depresioni. Një problem i madh jo vetëm në Shqipëri por kudo është edhe stigmatizimi që ju bëhet këtyre personave. Shumë shtete kanë filluar që të nxjerrin edhe të dhëna lidhur me përqindjen e atyre që janë prekur nga probleme të shëndetit mendor. Në Kinë rezulton se rreth 35 % e popullsisë kanë shqetësime të tilla. Sipas kësaj përllogaritjeje në Shqipëri mund të jenë rreth 1 milion persona që do të përjetojnë këto ҫrregullime për shkak të izolimit. Ndërkohë të dhënat e mëparshme tregojnë se në Shqipëri janë rreth 350.000 njerëz që vuajnë nga shëndeti mendor, një shifër kjo më e lartë sesa ata që vuajnë nga diabeti. Ndërkohë rreth 85 % (297 mijë) prej tyre nuk marrin trajtim. Këto të dhëna vijnë nga Arlinda Cerga, e cila prej 27 vitesh jeton në Angli ku angazhohet si psikologe dhe drejtuese e studimeve shkencore për shëndetin mendor.