Fjala e dytë më e kërkuar në Google nga shqiptarët gjatë vitit 2019 ka qenë pikërisht “si të luaj loto online”. Në fillim të vitit të kaluar, më 1 janar 2019, hyri në fuqi ligji që mbylli 4.300 pikat e basteve që kishin “mbirë” në thuajse çdo rrugicë lagjeje (raport tejet i lartë - një pikë bastesh për 670 banorë). Bastexhinjtë tregojnë se mjafton të regjistrohesh në një kompani të huaj të licensuar bastesh, pasi ato shqiptare punojnë në të zezë dhe nuk janë të besueshme dhe gjithçka vazhdon si më parë. Ata që luajnë thonë se i gjithë procesi u ngjan blerjeve online. Rrjedhimisht, pasojat nga kumari vazhdojnë të jenë të njëjtat në familje. Këshilli Shqiptar për Problemet e Lojërave të Fatit është një organizatë jofitimprurëse dhe joqeveritare e cila ka për qëllim rritjen e informimit publik rreth problematikave që sjell varësia nga kumari, të bëjë të mundur sensibilizimin dhe ndërgjegjësimin publik, gjithashtu të trajtojë me kujdes fenomene të këtyre natyrave. Raste të evidentuara nëpërmjet linjës së këshillimit, chatit live dhe këshillimit email për varësinë nga kumari: Total i rasteve: 154 Nëpërmjet linjës telefonike: 68 Nëpërmjet chatit live: 64 Nëpërmjet këshillimit me email: 22 Mosha: 16-24 vjeç 53 raste = 34.4 % Mosha: 25-34 vjeç 88 raste = 57.1 % Mosha: 35-44 10 raste = 6.5 % Mosha: 45 ≤ 3 raste = 2 % Nga këto 154 raste, 124 raste janë nga familjarë dhe 30 raste janë komunikuar direkt nga lojtarë. Pra 80.5% nga familjarë dhe 19.5% nga vetë lojtarët.